இணையில்லாத இறைவா எனக்கு கருணை புரிவாயே

இணையில்லாத இறைவா எனக்கு கருணை புரிவாயே
இம்மை வாழ்வில் இறைவா எனக்கு அருளை பொழிவாயே
இறைவா அருளை பொழிவாயே
மருளும் நரகை இறைவா எனக்கு மருள வைப்பாயே
மறுமை வாழ்வில் இறைவா எனக்கு உன்னைத் தருவாயே
இறைவா உன்னைத் தருவாயே

பிறந்த உயிர்கள் சுவைக்கும் மனிதா இறப்பைப் படைத்தானே
இறந்த உடல்கள் நடக்கும் மனிதா மறுமை திடல் தானே
சுமந்த தாயின் சுமைகள் மனிதா இறங்கும் நாள் தானே
நிறைந்த அமல்கள் சுமப்பாய் மனிதா மஹ்ஷர் வெளிதானே
மனிதா மஹ்ஷர் வெளிதானே

நபியின் வழியில் நடந்தால் மனமே வாழ்வு சிறந்திடுமே
நபியின் ஸலவாத்ததனில் மனமே வளங்கள் பெருகிடுமே
நபியை காண்பதற்கே மனமே கண்கள் ஏங்கிடுமே
நபியை கண்ட உடனே மனமே கல்பும் குளிர்ந்திடுமே
மனமே கல்பும் குளிர்ந்திடுமே

உயிரை எடுக்கும் மலக்கே வருவீர் அழைக்க ஒருநாளே
உதட்டில் ஒலிக்கும் மலக்கே கலிமா இறைவன் அருளாளே
உவந்து வருவேன் மலக்கே இறையை காண அந்நாளே
உவகை கொள்வேன் மலக்கே அந்நாள் எந்தன் மணநாளே
மலக்கே எந்தன் மணநாளே

இறுதித்தூதர் நபியே எனக்கு கருணை புரிவீரே
இறையின் முன்பு நபியே எனக்கு பரிந்து உரைப்பீரே
பானம் அருந்த நபியே எனக்கு அள்ளித் தருவீரே
பாலம் கடக்க நபியே எனக்கு உதவி செய்வீரே
நபியே உதவி செய்வீரே

கவி: முஹிப்புல் உலமா அல்ஹாஜ் முஹம்மது மஃரூப் அவர்கள் (துபாய்)