இறுதிக் கடமை ஆற்றி வந்த
புண்ணியர்களே
மகிழ்ந்து உம்மை வாழ்த்துவோம்
நெகிழ்ந்து பாடிப் போற்றுவோம்
விண்ணவர்கள் போற்றும் நபியை
மனதில் ஏந்தியே
மன்னவன் தன் அழைப்பை ஏற்று
மக்கம் ஏகினீர்
சிறந்த பேறு அல்லவோ
நிறைந்த பாக்யம் அல்லவோ
கோடி நிலவு அழகை விஞ்சும்
புனித வீட்டினை
தேடிச் சென்று நாதன் முன்
பணிந்து வேண்டினீர்
பகர்ந்த நாட்டம் யாவுமே
உகர்ந்து ஏற்க இறைஞ்சுவோம்
உணர்வு மீறி உருகி வந்த
உள்ளத் துளிகளும்
இறையிடம் மன்றாடி அருஷைத்
தொட்டுக் கசியனும்
மிகுந்த கருணை கொண்டவன்
கனிந்து ஏற்று அருளுவான்
தூயக் கடமையில் நிறைந்த
கிரியை யாவிலும்
நேய நபியின் ஞாபகங்கள்
சூழ்ந்துக் கொள்ளவே
திறந்த இதயத்தோடு நீர்
அறிந்து அமல்கள் ஆற்றினீர்
பிணிகள் தீர்க்கும் மதீன நகரில்
அல்லும் பகலுமாய்
நாவினிக்க மன்னர் நபியின்
மதுஹைப் பாடினீர்
உறைந்த பாசம் பொங்கவே
கலந்துக் காதலாகினீர்
தேக்கி வைத்த ஏக்கங்களை
போக்கி தீர்க்கவே
தேம்பித் தேம்பி அவர்களிடம்
மன்றாடி வேண்டினீர்
பிறந்த பாலகரைப் போல்
சிறந்து வீடு திரும்புனீர்
நோயின் பிணிகள் நீங்கிடவும்
மழழைப் பேற்றையும்
கைகள் ஏந்தி கெஞ்சிக் கேட்ட
வேண்டல் யாவையும்
விரைந்து நாயன் ஏற்கவே
கரைந்து கரங்கள் ஏந்துவோம்
நெஞ்சங்களின் எண்ண ஓட்டம்
அறியும் தூயனே
மீண்டும் மீண்டும் யாவருக்கும்
வாய்ப்பை நல்கிடு
கண்ணாலே உந்தன் நேசரை
என்னாளும் காணச் செய்திடு
வாழ்த்து: அஹ்மது ஸாலிஹ் ஃபஹீமீ